يا ولاد بلادي
هو فهمكم بعد 23 سنة غلط في غلط
وأنا.... لتوّة ما فهمتكم
لتوة ما فهمت إللي عدّى عمرو في ظلام الزنزانات وخرج باش يحبس شعبو في زنزانة الظلمات
لتوة ما فهمت اللي سنين يناضل باش يحل عينين شعبو عالظلم، واليوم حب
السلطة عماه وخلاه كراكوز دكتاتور
ولتوة ما فهمت اللي بعث جواب بالغالط للوالي وكيف ما قضالوش، قال
"أنا ما نستعرفش بالدولة وما نيش باش ننتخب"
كيف ما تستعرفش بالدولة ما تعمّلش عالوالي ..
وكيف الوالي يطلع ساقط وما يقضيش... امشي انتخب باش تبدلوا
ياللي تقول الانتخابات مزورة... أبعث خوك.. بوك وصاحبك يلاحظ ويشوف
ياللي تقول اللعبة ملعوبة.. افرش كفك.. موجيرة وكوال سباطة
تخرج مالشيلينغ باش تندد بنسمة.. دبرت خدمة لولدك؟
خلصت ديونك؟ شريت روبة لمرتك؟
للي لسعوا السيستام ... أيا كان السيستام الجديد... وحدك تنجم تبدل
البرنامج
يقراولك ألف حساب ياللي موش قاري لروحك حساب
للي الجوع خلاه ليلو ما ينام
للي القناصة خلاو أولادو أيتام
هيا ننتخبوا
3 دقايق من عمرك... الضايع من قهوة لقهوة
ما عندك ما تخسر... بلادك ورقة رابحة
2 commentaires:
حبا لتونس يكون مثل هذا الكلام ومثل امثالك يجب ان يكون بكثرة في تونس العزيزة اتشرف بمعرفتك الله يرحم ولديك في هذا الكلام
بعد اذنك سوف انشره على الفيس وعلى ثوثل بلوس
مع ذكر المصدر
رؤوف
شكــرا رؤوف... أنا نكتب بقلبي، وقلبي على تونس، أما ما يكفيش
Enregistrer un commentaire